Osnovna škola Bol

Međunarodni likovni, recitatorski i likovni natječaj ČA u versin , riči i pinelu u organizaciji OŠ Bijaći i
Agencije za odgoj i obrazovanje okončan je 28. ožujka 2024. godine. Na literarni i likovni natječaj
poslani su radovi učenika nižih razreda OŠ Bol.
Drugu nagradu na literarnom natječaju dobio je Frane Cvitanić učenik 2. razreda s pjesmom „Koza“
dok je treću nagradu dobio učenik 4. razreda David Mrđen s pričom „Šempjasta maška“.

U nastavku su nagrađivani uratci naših učenika.

ŠEMPJASTA MAŠKA

U mojemu mistu, u centru Bola, svakega se dona jelna maška odmorala na šentodi pod Ložu. Bila je sivkasta sa carnima prugima. Imala je zeleno-žućkaste oči. Jelna šapica bila joj je carna, a druga bila. Luckasta je i zaigrana ta maška bila. Svi su je volili. Dica su se igrala s njon. Hodila bi do riborih koji bi joj bocili malo ribje dokle bi čistili mriže. Neki ribori bi je vodili sa sobon i na lignje. Znala je ta maška i hodit do ribarnice. I tuote bi se lipo oslodila. Maška se dobro navikla na jude, a i oni na nju. Znalo ju je cilo misto, a i pokoji furešt. Dica bi se najviše smijala kad bi maška lovila vlastiti riep. Jedon put se popiela na murvu kraj moje
skule i mijaukala iz svega glosa. Vatrogasci su je morali kalat jer se soma ni mogla. Drugi put je ušla u butigu pa su je prodavačice tieška sarca morale istirot vonka. Puno je nestašluka ta maška činila pa smo je svi zvoli šempjasta maška, a mi dica bi je zvali Šempjica. Jelnega dona ni bilo ni traga ni glosa od nje. Vrime je prolazilo, a Šempjice nidir. Svi su pomislili na nojgorje. Kad eno ti jelnega jutra šempjasta maška pomalo dohodi prema Loži, a za njon se targuzodu četiri mole maškice. Svi su bili peterostruko sritni ča se Šempjica vrotila.

David Mrđen

Osnovna škola Bol, Brač

mentor: Marina Soljačić

KOZA

U nonota mojega imo jedna koza,
Kuho njon i nosi kiće,
A njon nojslaja od suside loza,
Već vidin, skondola i vike biće.
Ma ostav se loze i tujih dvori,
Pogledoj koliki ti je dropčić,
Dere se nono, sve se ori,
Priti kozi da završit će u kotlić.
Misli se koza, mlješće justima,
Sva sita i kuntenta,
Bome lozu neće jist susida,
Za obid njon je uvik pulienta.

Frane Cvitanić, 2.razred
Osnovna škola Bol, Brač
mentor Branka Šesnić